De Neelder Garde

De Neelder Garde is een gezellige verzameling van miense die rondjom en mit de vastelaovend sjpas en plezeer make. Dit klöpke is opgerich mit halfvaste 2004. DNG, zo wie De Neelder Garde kortwaeg waerd genump, is ein vereniging nao 't veurbeeld van de bekinde gardes wie De Rote en Blauwe Funken oet Kölle of oos eige Remunjse sjtadtsgarde Faubourg St.Jacques oet de binnesjtad.

Tiedes de installasie in november 2004 door oos vrunj van de sjtadsgarde oet Remunj en de KKS oet Kirkraoj haet DNG zich gepresenteerd aan 't Neelder publiek. In 't eerste sezoen is al gebleke det DNG ein prominente rol kint vervulle in 't rieke Neelder vastelaovesgebeure. Veer trekke oet biej de Prinseresepsies van de Katers, de optochte in Neel en Remunj en zeen nadrukkelik aanwezig biej de diverse activeite in de Neelder kefees, zaale en natuurlik de Jeugsoos.

't Hoofkwarteer van DNG is kefee 't Dörp biej Leon en Mirjam wo veer ein geweldige toeshave höbbe. Hie kinne veer zelfs terech veur oos aovendaete en op vastelaovesmaondig 't traditionele Gardebreudje, 't onbijt veur alle leje van DNG.

DNG besjteit in november 2008 oet 25 gardiste inde laeftied van 0 tot 60 plus die actief zeen in de versjillende ongerdeile. De Neelder Garde haet ein eige meziekkepelke (batterpilleton), ein gewaerepilleton, eine marketentstergroep en ein eige jeuggarde en dansmeriekes. Jaorliks waerd oet de groep eine veurgenger gekaoze, de Gardeprizzedent. Daonaeve is d'r ouch eine kok en waerd de jeug aangeveurd door ein gardemaedje of menke. Dit triejo waerd ongersjteund door ein secondante, ein van de marketentsters. De Neelder Garde besjik euver eine kleine wage en zal in de toekoms ouch ein kenon gaon trekke inne optochte.

Om geldj inne kas te kriege veur uniforme, materijaal veur de wage, medalies enz. organiseert DNG versjillende evenemente. Zo sjtaon veer vriedigs veur de vastelaovend garant veur eine gezellige aovend onger 't motto: De Aaftrap van de vastelaovend in zaal 't Dörp. Hiej traeje diverse artieste en kepelle op oet Neel en omgaeving. In 2008 sjtinge onger angere W-Dreej en Kartoesj op de buun.

Daonaeve organiseert DNG eder jaor minstes ein rommelmert en verkoupe veer sjleutelhangers mit oos logo.

Natuurlik kinne veer ouch sjponsors gebroeke. Veer vinje 't waal belangriek det sjponsors zich toes veule biej DNG en neudige oppe tied de bedrieve oet veur oos evenemente. Veer make ein ongersjied tösse Jaorsjponsors en hoofsjponsors. Wilt geer gaer eure naam verbinje aan DNG, dan kint geer kontak opnaeme met oos sikkertarijaat.