November 2003

Rudi Kuyltjes nump ’t besjloet om nao de vastelaovend te sjtoppe biej de Prinsekepel van Neel, hae haet dan 11 jaor d’r op zitte, hae wilt ’t röstiger aan gaon doon….

November 2003

– Fibberwari 2004

Rudi zit te prakkezere waat hae de kommende jaore met de vastelaovend geit doon

Zondig 8 fibberwari

Rudi geit same met Robert Tobben nao de (hele waterkaaje) optoch van de Gardetref kieke in de binnesjtad van Remunj. Tot drie keer toe zeen ze vanaaf versjillende oetkiekposte de ganse optoch naevetrekke.

Later waere de eerste serieus planne gemaak onger ein tas koffie biej ’t Dörp. Dit mot in Neel toch ouch kinne?

Maart 2004

In ’t blaad ‘Forte’van Sjötterie St.Urbanus en eine nuutsbreef van amateursjötterie St.Lerang sjteit eine oproop veur leje biej de nuuj op te richte Neelder Garde

Zondig 28 maart 2004

Halfvaste zitte ongeveer 30 persone inne zaal van ’t Dörp biej de oprichtingsvergadering van ein Garde, De Neelder Garde. In eerste insjtansie waere allein leje van St.Urbanus en St.Lerang toegelaote om de nuuj garde neet te groot te make

Zondig 21 november 2004

Nao inkele maondje heel herk werke, vergadere biej de Barbekjoe, rondjsjoje biej 30 grade in Kerkraoj op zeuk nao medalies en sjteke (en de eerste bon veur te hel rieje vanne pliesie veur ’t Hoof medalies van DNG, Bert Lucas..), pakke passe in Heitse en kontakte ligke met de Remunjse Sjtadsgarde veur goje raod is ’t zo wiet:

De installasie van De Neelder Garde in zaal ’t Dörp in Neel door de Remunjse Prinselikke Sjtadtsgarde Faubourg St.Jacques same met De Kling (KKS) oet Kerkraoj (kleinste garde van Europa besjtoande oet twee man). Ouch de toenmalige modervereniginge St.Urbanus en St.Lerang sjture ein dillegasie veur dit sjoon moment. 

De zaal is bomvol en de Neelder luuj, V.V. de Katers en anger gaste zeen getuge van ein nuuj garde met 32 leje. DNG besjteit dan oet ein Drumbend met blaozers (later de Gardekepel), ein gewaerepilleton, marketentsters en ein jeuggarde met drie dansmeriekes. Achtereinvolges waere kommendant Robert Tobben, veurzitter Rudi Kuyltjes en alle gardiste offiesjeel geïnstalleerd en krieg ederein de lejemedalie (groot kruuts met embleem van DNG) omgehange. De kleintjes kriege ein buuske sjmarties omgehange.

Vervolges waerd John Schuman benump tot kok van DNG, Lia schuman is de secondante, Melissa Linssen Gardemaedje en Jack Hawinkels moog es eerste prizzedent van DNG de vaan drage. De sjtek van de vaan besjteit oet ein parasollesjtek van Jan Graus en is verder bewerk door Chris Fusers en Piet Opbroek met es sjoon detaj eine gardeklopper baove d’rop. De vaan zelf is gemaak door Annie Opbroek en ’t embleem van DNG, gemaak in Pakistan kump maar net oppe tied aan in Neel. Om de vaan neet te laote besjadigge door raege, sjnee, beer, limmenaat, sjroebeleer en zo waerd d’r ouch ein plastic hoes gemaak veur de vaan. Piet Opbroek zorg veur sjitterende gewaere en de sabel veur de kommandant is ein antiek sjtök van St.Urbanus  

Later oppe middig traeje onger angere de (Jeug)Prinsekepel van Neel, Wil I en Thierry I van V.V. De Katers, Patrick Roger, Patrick Gerets, Biej Huub Baove en es klapper Mesjeu Maurice op. Helaas motte oos gaste nog nao anger activiteite zodet de letste arties ’t met eine halve zaal mot doon, de sfeer en de sjpass is d’r waal neet minder om. Eine zeer gesjlaagde en sjone middig!

Zondig 30 jannewari 2005

Veur de eerste keer trek de ganse Neelder Garde compleet oet. Ein dillegasie is waal al aanwezig gewaes biej ’t oetrope van Jeugprins Remco I en Prins Erik IV van V.V. De Katers en Veurzitter Rudi haet ein rol gesjpeeld es gardemenke in eine tattoesjop tiedes de Bontj Aovend.

Vandaag sjpeelt de gardedrumbend same met ’t jachhoornkorps van St.Urbanus oppe resepsie van Remco I. De dansmeriekes höbbe onger leiding van Diana Simons eine geweldige dans geleerd op de meziek van Rot-Weiss Kölle en moge veur ’t eers danse. ‘t is ein geweldig debuut ondanks de zenewe. Nao ’t hendjes gaeve geit DNG nog effe oefene inne hoeskamer van de veurzitter. Op ’t leedje Pretty Woman waerd ein teks van DNG gezonge.

Vervolges geit DNG veur ’t eers de dörpsgrens euver nao de sjtad. In ’t Witte Kirkske in de Remunjse Veursjtad organiseert De Sjtadtsgarde ein zitting. DNG waerd op ein geweldige meneer ontvange door de Uule, Gardiste en anger vastelaovesgekke oet de sjtad. Met sjlaonde trom, ’t nuuj leedje, ’t denske en ein toesjraok leut DNG van zich heure en krieg de nuuj garde oet Neel de luuj oppe benk, kippevel. Later waerd nog effe naogekald in ’t hoofkwarteer, ’t Dörp.

Vriedig 4 fibberwari 2005

Omdet de Neelder Fielhermenie geine tied haet om ein vastelaoveskonzaer inein te zitte waerd DNG gevraog om deze aovend, waat es ’t begin van de Neelder vastelaovend waerd gezeen, toch oppe plenk te bringe onger de naam ‘de aaftrap van de vastelaovend’.

Jack Hawinkels en Bert Lucas zitte ein program inein. Presentators van de aovend zeen Rudi Kuyltjes en Vors Eric Obstals van De Katers. ‘t waerd eine geweldige aovend met dank aan heel get Neelder en Remunjse artieste, kepelle en de nuje band Gruppo Agogo. DJ Lei dreijt de zaak aanein. Later waerd in euverligk met de Fielhermenie besjlaote om dit evenement jaorliks te haje in zaal ’t Dörp georganiseert door DNG.

Zaoterdig 5 t/m dinsdig 8 fibberwari 2005

De eerste vastelaovend veur DNG. De Garde leut zich euveral zeen tiedes de resepsie vanne prins, optochte van Neel en Remunj met eine eige wage, zale en kefees in Neel. Inne optoch van neel haolt DNG de 3e pries biej de grote groepe.  

Op dinsdig waerd ‘t eerste sezoen aafgesjlaote tiedes ’t door St.Urbanus georganiseerde Sjpek met eijer. De garde is tiedes ’t aafnumme van de medalies door de kommandant zeker neet compleet. Inkele gardiste werke inne keuke op deze morge en ein paar leje zeen krank en ligke met griep in bed. Toch is ederein d’r euver ins det ’t eine sjone vastelaovend is gewaes!

Zondig 13 november 2005

Äöpening van ’t 2e sezoen van DNG in ’t Hoofkwarteer. De garde is waal ein paar leje kwiet, maar krieg d’r weer 7 biej. ’t Totaal aantal gardiste sjteit daomet op 36. In ’t biezeen van de (jeug)prins en de raod van de Katers waere de nuuj leje geïnstalleerd en krieg ederein weer zien medalie. Same met John de Kok en de Kommandant waerd ’t nuuj Gardetriejo oetgerope en ongersjeije met de medalie. ’t Zeen Sam van Dongen (Gardemenke), Sabine Tobben (secondante) en Erwin Linssen (Prizzedent en drager van de Vaan.) 

Zondig 12 fibberwari 2006

Naeve alle vaste evenemente zo wie ’t prinsoetrope geit ein dillegasie van DNG same met de Sjtadtsgarde van Remunj nao Eupen in Belsj. Dao waerd vandaag de Gardetref gehaje van de Federasie van Eurgionale Gardes (oet Belsj, Ned. Limburg en Pruses)

Zondig 12 november 2006

Tiedes de aöpening van 't nuuj vastelaovessezoen biej 't Dörp waerd Pascal Peeters benump tot de nuje kommandant van DNG. Hae krieg van Prins ErikV van De katers de sabel oetgereik en moog daonao ederein de medalie omhange. Ouch waere twee nuuj gewaerdragers veurgesjteld, toevallig zeen dit de eerste twee prizzedente van DNG. Ouch waere zie opgenaome in 't SAP, de Sjoenkelende Aad Prizzedente. Wil Koelen waerd daonao oetgerope tot de nuje Prizzedent, Monique Lucas de secondante en Sharon Meisters 't Gardemaedje. 

vriedig-Zondig    26-28 jannewarie  2007

Op inisjatief van Bert Lucas waerd d'r eine echte Gardesjlager gemaak. Jan Huyskens teikent veur de teks op ein nummer van de Black Föös oet Kölle, det bewerk en opgenaome waerd door Tof Deckers. Nao eine echte 'idols-aovend' op eine doordewaekse aovend in 't Dörp waere de zengers en zangeresse oetgekaoze door ein deskundige zjurie. Wil en Monique deile same de 1e sjtum terwiel de anger sjtumme waere ingezonge door Piet, Erwin, John, Wim en Ivon. Tiedes de Neelder Bontje aovende/middig 2007 kint 't Neelder publiek offisjeel kinnes make met dit nummer wo ein dillegasie van DNG oppe buun sjteit.